Россияда Ўзбекистон дипломатлари маҳаллий фуқарони калтаклагани айтилмоқда
Элчихона тарқалаётган хабарларга ойдинлик киритди.
Россия пойтахтида яшовчи бир эркак Ўзбекистоннинг Москвадаги элчихонаси яқинида тан жароҳати олгани ҳақида маълум қилди. Бу ҳақда Readovka нашри хабар берди.
Нашр маълумотига кўра, ҳодиса эркак уй ҳайвони билан сайр қилиб юрган пайтда содир бўлган. У элчихона яқинида нотўғри жойлаштирилган автомобилга эътибор қаратган ва машинада ўтирганларга оғзаки изоҳ билдирган.
Жабрланувчининг сўзларига кўра, бунга жавобан аввал таҳдидлар, сўнгра жисмоний куч ишлатиш ҳолати кузатилган. Эркакнинг айтишича, унга ҳужум қилган шахслар Ўзбекистон дипломатик ваколатхонаси ходимлари бўлган.
Шунингдек, даъво қилинишига кўра, юзлари тушиб қолган ёзув тармоқларга чиқиб кетмаслиги учун ҳодиса иштирокчилари унинг мобил телефонини синдиришга уринган. Жабрланувчи полицияга мурожаат қилган.
Ўзбекистоннинг Москвадаги элчихонаси мазкур хабарларни рад этди. Элчихона маълумотига кўра, воқеада тилга олинган автотранспорт воситаси ва ҳуқуқбузарларнинг Ўзбекистоннинг Россиядаги элчихонасига ҳеч қандай алоқаси йўқ.
