16 ёшдан кичик бўлганларга энергетик ичимликлар тақиқланиши мумкин
Буюк Британия ҳукумати болалар соғлиғини ҳимоя қилиш мақсадида янги қонун ташаббуси билан чиқди.
Буюк Британияда 16 ёшдан кичикларга энергетик ичимликлар сотилиши тақиқланиши режалаштирилмоқда. Тақиқ Red Bull, Monster, Prime каби юқори кофеинли ичимликларга тааллуқли бўлиб, дўконлар, ресторанлар, кафелар, савдо автоматлари ҳамда интернет орқали савдога ҳам татбиқ этилади.
Соғлиқни сақлаш вазири Уэс Стритингнинг таъкидлашича, болалар кўпинча энергия ичимликларини ортиқча истеъмол қилмоқда ва бу уларнинг уйқуси, диққатини жамлаш қобилияти ҳамда умумий соғлиғига салбий таъсир кўрсатмоқда. Тадқиқотларга кўра, мамлакатда 13–16 ёшли ўқувчиларнинг учдан бири мунтазам равишда бундай ичимликларни истеъмол қилади.
Янги қонун лойиҳаси бўйича 12 ҳафта давомида мутахассислар, жамоатчилик, чакана савдо тармоқлари ва ишлаб чиқарувчилардан фикр-мулоҳазалар йиғилади. Мутасаддилар тақиқ кучга кирса, у минглаб болаларда семириш, уйқусизлик ва безовталикнинг олдини олишга хизмат қилишини таъкидмоқда.
Соғлиқ мутахассислари бу ташаббусни қўллаб-қувватлаб, энергетик ичимликлар болалар саломатлигига жиддий хавф туғдираётганини қайд этмоқда. Йирик супермаркетларнинг аксарияти аллақачон бундай ичимликларни ўз ихтиёри билан вояга етмаганларга сотишни тўхтатган.
