Путин: Хитойда АҚШ сиёсатига қарши фикрлар билдирилмади

Россия Федерацияси Президенти Владимир Путин АҚШ раҳбари Дональд Трампнинг Россия, Хитой ва Шимолий Корея ўртасида АҚШга қарши “махфий тил бириктириш” эҳтимоли ҳақидаги баёнотига муносабат билдирди.

 

Пекинда бўлиб ўтган матбуот анжуманида Россия раҳбари бу фикрни Трампнинг ҳазил туйғусининг ифодаси сифатида баҳолади. “Сизга ғалати туюлиши мумкин, бироқ сўнгги тўрт кун ичида Хитойда ҳеч ким АҚШнинг амалдаги маъмурияти ҳақида салбий фикр билдирмади”, — деди Путин.

 

Россия Президенти қайд этишича, Шанхай ҳамкорлик ташкилоти саммити доирасида ўтказилган учрашувларда иштирок этган давлат етакчиларининг кўпчилиги Трампнинг халқаро мулоқотдаги ташаббусларини қўллаб-қувватлаган.

 

Шунингдек, Путин икки томонлама ҳамкорлик ва минтақавий хавфсизлик масалаларида Россия очиқ ва конструктив мулоқот тарафдори эканини таъкидлади. Унинг сўзларига кўра, глобал миқёсидаги мураккаб жараёнларга қарамай, давлатлар ўртасидаги ишончли мулоқотни сақлаб қолиш муҳим аҳамият касб этади.