Ҳиндистонда чақалоқ қорнидан икки ҳомила олиб ташланди

Ҳиндистоннинг Ҳарьяна штати Гургаонда жойлашган клиникада тиббиёт тарихига кирувчи ноодатий жарроҳлик амалиёти ўтказилди. Бир ойли чақалоққа қилинган операция чоғида унинг қорнидан икки ривожланмаган ҳомила муваффақиятли чиқариб олинди. Бу ҳақда The Times of India нашри хабар берди.

 

Мутаҳассисларнинг изоҳ беришича, мазкур ҳолат “ҳомила ичида ҳомила” деб юритилади ва жуда кам учрайди — ҳар 500 минг туғилишдан бирида. Бундай аномалия ҳомиладорликнинг дастлабки ҳафталарида юзага келади: эгизаклардан бири ривожланмай қолиб, иккинчисининг танасида жойлашиб қолади.

 

Шифокорларнинг маълум қилишича, чақалоқнинг онаси уч эгизакни кутган, бироқ ҳомиладорлик давомида ривожланмаган ҳомила қолган иккитаси билан қўшилиб кетган. Бола туғилгандан йигирма кун ўтгач, қорни шишиб, овқатланиши тўхтаганидан сўнг шифохонага олиб борилган. Текширув жараёнида ошқозон соҳасида ўсма шаклидаги тузилма аниқланган, жарроҳлик вақтида эса бу ривожланмаган эмбрионлар экани маълум бўлган.

 

15 нафар мутахассис иштирокида икки соат давом этган мураккаб операция чақалоқнинг ички органларига шикаст етказмаслик учун юқори аниқликда ўтказилган.

 

“Бундай ҳолат тиббиётда ниҳоятда нойоб ҳисобланади. Бир эмас, икки эмбрионни бир чақалоқ ичида учратиш — биз учун катта тажриба бўлди. Энг мураккаб жиҳати эса шунчалик кичикча организмда нозик жарроҳликни бажариш бўлди”, — дейди шифокорлардан бири.

 

Айни пайтда чақалоқнинг аҳволи барқарорлашгани ва ўзини яхши ҳис қилаётгани маълум қилинди.