АҚШ Россия фуқаролари учун виза қоидаларини мураккаблаштирди
Янги тартибдан сўнг россияликлар исталган элчихонада эмас, балки фақат белгиланган манзилларда виза олиши мумкин.
АҚШ Давлат департаменти Россия фуқаролари учун Америка визаларига ҳужжат топшириш тартибини ўзгартирди. 6 сентябрь куни кучга кирган янги қоидаларга кўра, эндиликда Россия фуқаролари АҚШнинг исталган дипломатик ваколатхонасига мурожаат қила олмайди.
Унга кўра, россияликлар фақат икки манзилда – Қозоғистоннинг Остона шаҳридаги ёки Польшанинг Варшава шаҳридаги АҚШ элчихоналарида ҳужжат топширишлари мумкин. Ушбу чекловлар фақат туристик, талабалар ва бошқа ноиммиграцион визалар учун амал қилади.
Давлат департаменти талаблари бўйича, аризачилар суҳбатдан ўтиши ўз фуқаролиги ёки доимий яшаш жойи бўлган мамлакатда амалга оширилиши шарт. Россияда эса АҚШ визасига ариза топшириш имконияти 2021 йил апрелидан бери тўхтатилган эди. Шу сабабли Россия фуқаролари сўнгги йилларда бошқа мамлакатлардаги элчихоналарга мурожаат қилиб келган. Энди эса бу амалиёт чеклаб қўйилди.
Янги тартибга кўра, илгари тайинланган суҳбат санаси ўз кучини сақлаб қолади. Шунингдек, бошқа давлатда яшаш ҳуқуқига эга бўлган россияликлар визани шу мамлакатда олиши мумкин. Бошқа ҳолларда эса фақат истисно тариқасида – фавқулодда гуманитар, тиббий ёки сиёсий сабабларга кўра бошқа консулликларга мурожаат қилиш рухсат этилади.
