Қуддусдаги ҳужумда ҳалок бўлганлар сони 5 нафарга етди
Отишмада камида 15 киши яраланган, улардан етти нафари оғир аҳволда экани айтилмоқда.
8 сентябрь куни эрталаб Қуддус шимолидаги Рамот чорраҳасида юз берган қуролли ҳужум оқибатида ҳалок бўлганлар сони беш нафарга етди. Дастлаб тўрт киши воқеа жойида вафот этган бўлса, яна бир киши шифохонада ҳаётдан кўз юмди.
Исроил соғлиқни сақлаш хизмати маълумотига кўра, камида 15 киши яраланган, улардан етти нафари оғир аҳволда. Шунингдек, икки киши ўртача, уч киши эса енгил жароҳатлар олгани билдирилди. Маҳаллий ОАВларга кўра, жабрланганларнинг айримлари ҳушсиз ҳолда топилган.
Гувоҳларнинг айтишича, икки нафар қуролланган шахс гавжум бекат ёнида тўхтаб турган автобусга қарата ўқ узган. Полиция уларни "террорчи" деб атаб, воқеа жойида "зарарсизлантирилганини" маълум қилди.
Ҳужумдан сўнг Исроил бош вазири Бенямин Нетаняху хавфсизлик хизмати раҳбарлари билан махсус йиғилиш ўтказаётгани ҳақида унинг матбуот хизмати баёнот берди. Ҳозирда тергов органлари воқеа тафсилотларини ўрганмоқда.
