Ташқи ишлар вазири фаолиятини давом эттирмоқда – расмий баёнот

Қозоғистон бош вазири ўринбосари – ташқи ишлар вазири Мурат Нуртлеу 6 сентябр куни ҳукумат биносида журналистлар олдида чиқиш қилиб, унинг “қўлга олингани” ҳақидаги тарқалган маълумотларни мутлақо ёлғон ва асоссиз деб атади.

 

“Бу ёлғон ва бемаънилик. Изоҳ беришга ҳам арзимайди. Мен ўтган ҳафта ҳам ишда бўлдим, учрашувлар ўтказдим, хорижий ҳамкасбларим билан телефон орқали мулоқот қилдим, инвесторлар билан музокаралар ўтказдим. Ҳаммаси одатдагидек давом этмоқда”, — деди вазир.

 

Мурат Нуртлеунинг таъкидлашича, у президентнинг Мурожаатномасидан сўнг хорижий сафарга чиқишни режалаштирган. Шунингдек, у мазкур ёлғон хабарлар юзасидан ҳуқуқни муҳофаза қилувчи органларга мурожаат қилишни шахсий зарурат деб билмаслигини қўшимча қилди.

 

Қозоғистон Ташқи ишлар вазирлиги ҳам расмий баёнот бериб, “Мурат Нуртлеунинг ҳибсга олингани ҳақидаги хабар ҳақиқатга тўғри келмайди, бу журналист этикаси ва амалдагӣ қонунчиликнинг қўпол бузилиши ҳисобланади”, дея маълум қилди.

 

Шунингдек, Дезинформацияга қарши кураш маркази ҳам ушбу ёлғон маълумотларни рад этди ва ёлғон хабар тарқатиш қонун билан жазоланишини, жумладан жиноий жавобгарликка сабаб бўлишини эслатди. Қозоғистон Миллий хавфсизлик қўмитаси ҳам МҚБ ходимлари ҳибсга олингани ҳақидаги хабарларни инкор этди.

 

Айни пайтда прокуратура “Ўрда” нашрининг бош муҳарририни ёлғон ахборот тарқатиш бўйича жиноий жавобгарлик ҳақида огоҳлантирди.