“Мен террорчилар пойтахтига қадам қўймайман”
Зеленский Путинни музокара учун Киевга таклиф қилди.
Украина президенти Владимир Зеленский Россия раҳбари Владимир Путинга музокараларни Киевда ўтказишни таклиф этди. Бу ҳақда у ABC News телеканалига берган интервьюсида маълум қилди. Унинг сўзларига кўра, Путиннинг Москвада учрашув ўтказиш ғояси вақтни чўзишга қаратилган.
“Ҳар куни мамлакатим ракета зарбалари ва ҳужумларга учраётган бир пайтда мен Москвага бора олмайман. Мен террорчилар пойтахтига қадам қўймайман”, — деди Зеленский.
Президентнинг таъкидлашича, Украина Аляскада бўлиб ўтган учрашувда иштирок этмагани афсусланарли ҳол бўлди. Унинг фикрича, Путин у ерда АҚШ президенти Доналд Трампдан ўзи истаган нарсаларни олган. Зеленский Кремль раҳбари Украина билан мулоқотга қизиқмаётганини, аксинча Трамп билан кўришишни жуда ҳам хоҳлашини қайд этди.
Зеленскийнинг сўзларига кўра, Россияга нисбатан қўшимча босим зарур. “Айрим ҳамкорларимиз ҳали ҳам Россия нефти ва газини сотиб олишда давом этмоқда. Бу — адолатсизлик. Россиянинг асосий қуроли — энергия ресурслари. Уни тўхтатишнинг энг самарали йўли — бу манбаларни харид қилишдан бутунлай воз кечиш”, — деди у.
Украина раҳбари хавфсизлик кафолатлари ҳақида ҳам тўхталиб ўтди. Унинг фикрича, мамлакатнинг ҳимояси фақат армиясига таянилиши мумкин. Зеленский Донбассда Украина қўшинларининг кучли позициялари мавжудлигини таъкидлаб, Россия бу ҳудудни тўлиқ эгаллаб олиш учун миллионлаб қурбон бериши керак бўлишини қайд этди. Шу билан бирга, у “буфер зона” яратиш режаси катта хато эканини, амалда 10–20 километрлик “ўлим зоналари” аллақачон мавжудлигини айтди.
Зеленскийнинг таъкидлашича, Путин Украина билан учрашишдан қочаётгани учун қабул қилиб бўлмайдиган таклифларни илгари сурмоқда.
