Суриядаги операцияларда ўзбекистонлик жангарилар қўлга олинди
Ҳибсга олинганлар ИШИД ва “Ал-Қоида” билан алоқадор гуруҳларга мансуб бўлган.
Суриянинг Идлиб вилоятида хорижлик жангариларга қарши олиб борилаётган кенг кўламли операциялар давомида бир нечта Ўзбекистон фуқаролари ҳибсга олинди. Бу ҳақда минтақадаги хавфсизлик манбалари хабар бермоқда.
Маълумотларга кўра, июн ойида “Абу Дужана” лақаби билан танилган ўзбекистонлик ҳарбий инструктор Аюб қўлга олинган. Шунингдек, август ойида Идлибдаги яширин манзиллардан бирида яна бир фуқаро — Ислом ушланган. 3 сентябр куни Ҳарам ҳудудида ИШИДга алоқадор ячейка фаолияти тўхтатилди, натижада Ўзбекистон ва Ироқ фуқаролари ҳибсга олинди.
Сўнгги йилларда бундай операциялар мунтазам давом этмоқда. 2020 йилдан буён “Шара ҳукумати” тузилмалари “Ал-Қоида” билан алоқадор “Катибат ат-Тавҳид вал-Жиҳод” гуруҳининг бир қатор ўзбек жангариарини ҳам қўлга олган.
Мутаҳассисларнинг қайд этишича, мазкур чоралар Идлибдаги қуролли тузилмалар устидан назоратни мустаҳкамлаш, хорижлик жиҳодчилар таъсирининг кенгайиб кетишига йўл қўймаслик ва минтақавий хавфсизликни таъминлашга қаратилган.
