Швеция соғлиқни сақлаш вазири матбуот анжуманида ҳушидан кетди
Ҳодиса ҳукумат таркибидаги ўзгаришларга бағишланган анжуман чоғида юз берган.
Швеция соғлиқни сақлаш вазири Элизабет Ланн журналистлар билан бўлиб ўтган матбуот анжуманида ҳушидан кетди. Бу ҳақда маҳаллий SVT телеканали хабар берди. Ҳодиса ҳукумат таркибидаги ўзгаришларга бағишланган анжуман чоғида юз берди.
Ланн бош вазир Улф Кристерссон, энергетика ва тадбиркорлик вазири Эбба Буш ҳамда ижтимоий масалалар вазири Якоб Форсмед билан биргаликда минбардан чиқиш қилаётган бўлган. Шу пайт Элизабет Ланн тўсатдан ҳушини йўқотиб, минбардан йиқилиб тушган. Вазир тезда залдан олиб чиқилган.
Бир неча дақиқадан кейин Элизабет Ланн қайтиб келиб, йиғилган журналистларга қондаги қанд даражаси кескин тушиб кетганини айтган. Шунга қарамай, матбуот анжумани тўхтатилиб, кейинга қолдирилган.
Маълум бўлишича, Гётеборг шаҳар кенгаши аъзоси ва “Христиан демократлар” партияси вакили бўлган Ланн ҳушидан кетган куни соғлиқни сақлаш вазири этиб тайинланган. У собиқ вазир Ако Анкарберг Ёханссоннинг кутилмаганда истеъфога чиқиши ортидан лавозимга келди.
