Россияга қарши халқаро санкциялар кенгайтирилмоқда
Буюк Британия, Янги Зеландия ва Япония янги санкциялар жорий қилди.
Россиянинг агрессив сиёсати ҳамда уруш ҳаракатларига жавобан қатор давлатлар томонидан янги чеклов чораларини қўллаш тўғрисида қарор қабул қилинди.
Буюк Британия ҳукумати Россияга қарши санкциялар рўйхатини 30 бандга кенгайтирганини маълум қилди. Шунингдек, ҳужжатга кўра, санкциялар пакетига 70 та янги тушунтириш киритилган.
Янги Зеландия ташқи ишлар вазирлиги баёнотига кўра, мамлакат Россия нефтнинг максимал нархини бир баррел учун 47,6 доллар қилиб белгилади. Бундан ташқари, 19 нафар жисмоний ва юридик шахс ҳамда Россия нефт секторига алоқадор 19 та кема санкциялар рўйхатига қўшилди.
Япония Вазирлар Маҳкамаси ҳам Россия ҳамда айрим учинчи давлат компанияларига қарши қўшимча чекловларни жорий этганини билдирди. Янги санкциялар доирасида 14 нафар россиялик шахс ва 48 та компания ҳамда ташкилотга нисбатан чоралар белгиланди. Токио, шунингдек, Россия нефт нархини бир баррел учун 47,6 доллар қилиб белгилади.
