АҚШда Чарли Киркнинг ўлдирилишида гумонланувчи қотил ҳибсга олинди
Доналд Трамп гумонланувчига ўлим жазоси қўлланилишига умид билдирди.
Америкалик консерватив фаол Чарли Киркнинг ўлдирилишида гумонланувчи 22 ёшли Тайлер Робинсон Юта штатида қўлга олинди.
NBC телеканали тарқатган маълумотларга кўра, Робинсон ўз отасига жиноятни содир этганини тан олган. Отаси уни уйга қамаб қўйиб, кейин унинг жойлашуви ҳақида ҳуқуқни муҳофаза қилувчи органларга хабар берган. Бу маълумотни The New York Post ҳам тасдиқлаган.
Reuters агентлиги хабарида қайд этилишича, Юта полицияси гумонланувчини ҳибсга олганини тасдиқлаган. CNN телеканали эса тўртта мустақил манбага асосланиб, Робинсон ҳозирда сўроқ қилаётганини ёзди.
Аввалроқ АҚШ президенти Доналд Трамп Fox News телеканалига берген интервьюсида гумонланувчининг “юқори даражада аниқлик билан” қўлга олинганини маълум қилиб, унга нисбатан ўлим жазоси қўлланилишига умид билдирган.
ФҚБ директори Каш Пател яқин кунларда гумонланувчининг ҳибсга олиниши юзасидан батафсил маълумот бериши кутилмоқда.
Эслатиб ўтамиз, 10 сентябр куни Юта водийси университетида нутқ сўзлаётган Чарли Кирк снайпер ўқидан оғир жароҳат олиб, шифохонада вафот этган эди. У Доналд Трампнинг содиқ тарафдори ва машҳур блогер сифатида танилган.
