Аргентина “туғруқ туризми”ни тақиқлади
Энди хорижий фуқаролар бола туғилгандан сўнг дарҳол эмас, балки икки йил мамлакатда яшаганидан кейингина фуқаролик олиши мумкин.
Аргентина ҳукумати сўнгги йилларда россиялик аёллар орасида кенг тарқалган “туғруқ туризми” амалиётига чек қўйиш бўйича қатъий чораларни жорий қилди. Бу ҳақда Аргентина Республикасининг Россиядаги элчиси Энрике Игнасио Феррер Виейра Россия оммавий ахборот воситаларига берган интервьюсида маълум қилди.
Дипломатнинг сўзларига кўра, бугундан бошлаб Аргентина ҳудудида фарзанд кўрган хорижликлар, жумладан россиялик фуқаролар, бола туғилгандан сўнг дарҳол фуқаролик олиш имкониятига эга бўлмайди. Энди фуқаролик натурализация асосида берилади ва бунга кўра шахс 18 ёшдан катта бўлиши, мамлакат ҳудудида доимий яшаш жойига эга эканлигини исботлаши ҳамда камида икки йил мобайнида Аргентинани тарк этмаган ҳолда қонуний яшаган бўлиши шарт.
Виейра таъкидлаганидек, илгари айрим россиялик аёллар Аргентинага визасиз келиб, ҳомиладорлигини яширган ва давлатнинг бепул тиббиёт ҳамда ижтимоий хизматларидан фойдаланиб, бола туғилгандан сўнг мамлакатдан чиқиб кетган. Шу сабабли ҳукумат ушбу тартибни ўзгартиришга мажбур бўлди.
Расмий статистикага кўра, 2022–2023 йиллар давомида Аргентинага 23 мингдан ортиқ россиялик кириб келган. Улардан катта қисми мамлакат фуқаролигини олишни мақсад қилган, бироқ кўпчилиги узоқ қолмаган. Шу билан бирга, 2023 йилда Россиядан келганларга берилган яшаш рухсатномалари сони 3 700 тага етиб, рекорд даражага чиққан.
Аргентина ҳукумати миграция сиёсатини қайта кўриб чиқиш орқали давлатнинг таълим, соғлиқни сақлаш ва ижтимоий ҳимоя тизимларидан ноқонуний фойдаланишнинг олдини олишни мақсад қилган. Шу билан бирга, расмийлар қонуний тартибда миграция қилишни истаган шахсларни қўллаб-қувватлашини қайд этди.
Шунингдек, илгари Аргентинага туғилган боланинг ота-онаси паспорт олишнинг соддалаштирилган тартибидан фойдаланиб, фуқароликка ариза топшириш учун икки йил кутишга мажбур бўлмаган. Энди эса бу имконият ҳам тугатилди.
Аргентина паспорти халқаро миқёсда юқори кучга эга бўлиб, 170 дан ортиқ давлатга визасиз бориш имконини беради. Шу сабабли охирги йилларда бу ҳужжатни олишга қизиқиш сезиларли даражада ошган эди.
