Шимолий Кореяда хорижий сериалларни томоша қилганлар қатл қилинади
БМТ ҳисоботига кўра, Шимолий Кореяда хорижий, хусусан Жанубий Корея сериалларини тарқатган фуқаролар ўлим жазоси билан жазоланмоқда.
Бирлашган Миллатлар Ташкилоти инсон ҳуқуқлари бўйича тақдим этган янги ҳисоботида қайд этилишича, Шимолий Кореяда хорижий аудиовизуал маҳсулотларни, хусусан Жанубий Корея сериалларини тарқатиш ҳамда томоша қилиш кескин жазога сабаб бўлмоқда. Ҳисоботга кўра, мамлакатда ушбу фаолият учун ўлим жазоси қўлланилмоқда ва бир нечта фуқаро суд ҳукмига биноан қатл этилган.
БМТнинг Шимолий Кореядаги инсон ҳуқуқлари бўйича ваколатхонаси раҳбари Жеймс Хинаннинг маълум қилишича, 2014 йилдан буён мамлакатда кузатув технологияларидан кенг фойдаланилмоқда ва айниқса COVID-19 пандемиясидан сўнг оғир жаза чоралари кучайган. Шу билан бирга, оддий ва сиёсий тусдаги жиноятлар учун ҳам қатл этиш ҳолатлари сони ортгани кузатилган.
Шу билан бир қаторда, БМТ ҳисоботида қамоқхона шароитларида айрим зўравонлик ҳолатлари камайгани, суд-ҳуқуқ тизимида айрим ислоҳотлар амалга оширилаётгани қайд этилган. Бироқ халқаро ташкилот мамлакатдаги болалар меҳнати масаласидан жиддий хавотирда. Маълумотларга кўра, ўсмирлар хавфли саноат тармоқларида, жумладан кўмир қазиб олиш ва қурилиш соҳаларида, шунингдек “зарбдор бригадалар” таркибида мажбурий меҳнатга жалб қилинмоқда.
