Путин мигрантлар учун патент тизимини бекор қилишни таклиф қилди
Россия президенти меҳнат муҳожирларига оид тартибларни қайта кўриб чиқиш зарурлигини билдирди.
Россия президенти Владимир Путин мамлакатдаги меҳнат муҳожирлари учун амалдаги патент тизимини бекор қилиш масаласи муҳокама қилиниши кераклигини билдирди. Бу ҳақда у Давлат Думасидаги фракция етакчилари билан учрашувда маълум қилди.
“Биз мигрантлар учун патент тизимини бекор қилиш ҳақида ўйлашимиз керак. Бу тизим кенг қўлланилади. Ҳеч нарсани истисно қилмайман”, — деди давлат раҳбари.
Путиннинг сўзларига кўра, миграция мавзуси Россия фуқаролари учун “нозик масала” ҳисобланади ва федерал ҳамда маҳаллий ҳокимият органлари мавжуд муаммоларни яширмасдан ҳал этиши лозим.
Маълумот учун, ҳозирги тартибга кўра Россияга визасиз кирувчи хорижий фуқаролар иш фаолиятини амалга ошириш учун 30 кун ичида патент олишлари шарт. Бунда улар рўйхатдан ўтиши, тиббий кўрикдан ўтиши, рус тили, тарихи ва қонунчилигини билишини тасдиқлаши, шунингдек, белгиланган давлат бўжи ва солиқ тўловларини амалга ошириши керак.
Патент бир ойдан бир йилгача муддатга берилади ва фақат унда кўрсатилган ҳудуд ва фаолият доирасида амал қилади. 2025 йил 1 январдан бошлаб Москвада патент учун шахсий даромад солиғининг ойлик аванс тўлови 8 900 рублни ташкил этади.
Шунингдек, жорий йилнинг июлидан бошлаб мигрантлар учун рус тили имтиҳонидаги тинглаш ва гапириш топшириқлари мураккаблаштирилди, саволлар сони кўпайтирилди ҳамда минимал ўтиш баллари белгиланди.
