АҚШ суди Трампнинг даъвосини рад этди
Судя даъво аризаси қоидабузарлик билан берилганини билдирган.
АҚШ суди Доналд Трампнинг The New York Times нашрига қарши 15 миллиард долларлик даъво аризасини рад этди. Маҳаллий ОАВ маълумотича, судья Стивен Мерридей ариза қоидабузарликлар билан берилганини қайд этди.
Судьянинг таъкидлашича, ҳужжатда президент талабларининг моҳияти аниқ кўрсатилмаган ва жавобгарларга қаратилган даъволар мазмунли ифода этилмаган.
“Даъво — рақибни ҳақорат қилиш ёки қаттиқ танқид олиб бориш учун оммавий майдон эмас”, — деди Мерридей.
Суд Трампка 28 кун ичида тўғриланган янги ариза топшириш имкониятини берди. Унинг ҳажми 40 бетдан ошмаслиги лозим.
Эслатиб ўтамиз, 16 сентябр куни Трамп The New York Times’ни туҳматда айблаб, нашрни “ўнлаб йиллар давомида” ўзи, оиласи ва бизнеси ҳақида ёлғон тарқатганликда айблаган ҳамда уни “радикал сўл Демократик партиянинг овози” деб атаган эди.
