Камерун Президентининг қизи сайловчиларни отасини қўлламасликка чақирди
Пол Бия 1982 йилдан бери мамлакатни бошқариб келади ва 12 октябрдаги сайловларда 8-марта номзод сифатида қатнашмоқда.
Камерун Республикаси Президенти Пол Биянинг ягона фарзанди – Брена Бия ижтимоий тармоқлардаги чиқиши билан мамлакат жамоатчилиги эътиборини тортди. У эълон қилган видеомурожаатида Камерун фуқароларини 92 ёшли амалдаги президентни қўллаб-қувватламасликка чақирди.
Брена ўз мурожаатида ота-онаси билан шахсий муносабатлари издан чиққанини, оила аъзоларидан босим ва таҳдидларни бошдан кечираётганини айтди. Шунингдек, у президентнинг 8-марта сайловда иштирок этаётганини алоҳида таъкидлаб, мамлакат аҳолиси унга овоз бермасликлари лозимлигини билдирди.
Ушбу мурожаат қисқа фурсат ичида унинг шахсий саҳифасидан олиб ташланган бўлса-да, видеолавҳа маҳаллий ва халқаро оммавий ахборот воситаларида кенг тарқалиб кетди.
Маълумот учун, Камерун Президенти Пол Бия 1982 йилдан бери мамлакатни бошқариб келмоқда. У жорий йилнинг 12 октябрида ўтказилиши белгиланган президентлик сайловларида яна номзод сифатида иштирок этишини расман маълум қилган.
