Трамп хорижликлар учун виза тўловларини 500 баравар оширди
Янги тартиб хорижлик, айниқса Ҳиндистон ва Хитойдан келувчи IT-мутахассисларнинг мамлакатга оқимини камайтириши мумкин.
АҚШ президенти Доналд Трамп хорижий малакали мутахассислар учун иш визаси (H-1B) бўйича янги тартибни жорий этди. Reuters агентлигининг ёзишича, давлат раҳбари имзолаган фармонга кўра, H-1B визасини расмийлаштиришда компаниялардан 100 минг АҚШ доллари миқдорида йиғим ундирилади. Бу амалдаги тўлов ставкаларидан қарийб 500 баравар кўп.
Мазкур қарор, аввало, Америка технология сектори учун катта синов бўлиши мумкин. Чунки соҳага йирик компаниялар — айниқса, Ҳиндистон ва Хитойдан келадиган IT мутахассисларига таянади. Мутахассисларнинг фикрича, янги тўлов тизими АҚШдаги меҳнат бозорида хорижлик кадрлар оқимини сезиларли даражада қисқартириши мумкин.
АҚШда ҳар йили 85 минг атрофида H-1B визаси берилади. Бу визалар асосан юқори малакали IT мутахассислари, муҳандислар ва илмий тадқиқот соҳасида ишлайдиган кадрлар учун ажратилади. Янги тартиб эса компаниялар учун қўшимча молиявий юк бўлиб, стартаплар ва кичик бизнеслар учун ходим ёллаш имкониятларини чеклаши эҳтимол қилинмоқда.
АҚШ ҳукумати қарорни “миллий меҳнат бозорини ҳимоя қилиш ва америкалик мутахассисларнинг иш ўринларини устувор қўйиш” мақсади билан изоҳламоқда. Бироқ йирик технология корпорациялари ва халқаро бизнес ҳамжамиятида қарор кескин баҳс-мунозараларга сабаб бўлди.
