Эрон собиқ президенти қатл этилиши мумкин
У ядровий келишув сабабли танқидларга учраган.
Эрон собиқ президенти Ҳасан Руҳоний судда айблари исботланса, унга ўлим жазоси қўлланилиши мумкин. Бу ҳақида Эрон парламенти комиссияси аъзоси Камрон Ғазанфари маълум қилди.
Депутатнинг сўзларига кўра, Руҳоний мамлакатга етарлича зиён етказган.
“Бунга мисол – ядро келишуви. У фақатгина йўқотишларга олиб келди. Рухоний эса бундан фахрланарди”, — деди у.
Ғазанфари таъкидлашича, олдинги парламент Руҳонийга қарши саккизта шикоят топширган ва уларнинг барчаси судга юборилган. У судьялар раҳбари Голамҳусайн Муҳсиний Эжейини қонун талабларига кўра бундай ишлар устувор тартибда кўриб чиқилиши кераклигига қарамай, ҳеч қандай чора кўрмаганликда айблади.
“Руҳоний суд қилинганми? Жазоланганми? Агар шундай бўлса, тушунтиринг. Агар йўқ бўлса, нега суд қилинмагани ва жазо олмаганини айтинг”, — деган депутат.
Шунингдек, у марҳум президент Иброҳим Раисий ҳукуматидан судга юборилган бошқа иш ҳақида ҳам гапирган. Унга кўра, Руҳоний Саъдабод саройидан 48 та қимматбаҳо гилам ғойиб бўлишида ҳам айбланган.
