Сурия ва Украина дипломатик муносабатларни тиклади
Икки давлат ўртасидаги алоқалар 2022 йилда узилганди.
Украина президенти Владимир Зеленский Нью-Йоркда БМТ Бош Ассамблеясининг 80-сессияси доирасида Сурия президенти Аҳмад аш-Шара билан учрашди. Бу ҳақда Украина раҳбари ўзининг Телеграм-каналида маълум қилди.
Учрашув чоғида томонлар мамлакатлар ўртасида дипломатик муносабатларни тиклаш бўйича қўшма баёнот имзолади.
“Бугун Украина ва Сурия дипломатик муносабатларни тиклаш бўйича қўшма баёнот имзолади. Биз бу муҳим қадамни олқишлаймиз ва Сурия халқини барқарорлик йўлида қўллаб-қувватлашга тайёрмиз”, - деди Зеленский.
Украина раҳбари суриялик ҳамкасби билан ҳамкорликни ривожлантиришнинг истиқболли йўналишлари муҳокама қилинганини таъкидлади.
Бундан ташқари, президентлар “Украина ва Сурия хавфсизлигига таҳдидлар ва уларга қарши туришнинг аҳамияти” масаласига ҳам тўхталган.
Маълумот учун, икки мамлакатлар ўртасидаги дипломатик алоқалар 2022 йилда узилганди.
