Зеленский: Хитойсиз Путиннинг Россияси ҳеч нарса эмас
Украина раҳбари БМТ Хавфсизлик кенгашида Хитой Россияни урушни тўхтатишга мажбур қила олишини таъкидлади.
Украина президенти Владимир Зеленский БМТ Хавфсизлик кенгаши мажлисида Хитойнинг Россия устидан таъсирига алоҳида урғу қаратди.
Унинг таъкидлашича, агар Хитой хоҳласа, Москвани босқинни тўхтатишга мажбур қилиши мумкин. Зеленский “Хитойсиз Путиннинг Россияси ҳеч нарса эмас”, дея таъкидлади.
Шунингдек, Украина президенти Хитойнинг кўпинча жим туришини ва фаол тинчликпарварлик ташаббусларини илгари сурмаётганини танқид қилди.
Пекин эса ўзини ихтилофни ҳал этишда холис воситачи сифатида кўрсатишга ҳаракат қилмоқда ҳамда Россияга ҳарбий ёрдам берилаётгани ҳақидаги айбловларни рад этиб келади. Хитойнинг БМТдаги доимий вакили ўринбосари Гэн Шуаннинг баёнотига кўра, “Хитой инқирознинг илк кунлариданоқ объектив позицияни эгаллаб, музокаралар орқали сиёсий ечим топишни қўллаб-қувватлаган”.
