АҚШ Колумбия президентининг визасини бекор қилди
Бунга Нью-Йоркдаги Фаластин тарафдорлари намойишида айтган чақириқлари сабаб бўлган.
АҚШ Давлат департаменти 27 сентябр куни Колумбия президенти Густаво Петронинг визаси бекор қилинганини маълум қилди. Мазкур қарор унинг 26 сентябр куни Нью-Йоркда Фаластинни қўллаб-қувватловчи намойишда қатнашиб, АҚШ ҳарбийларини президент Дональд Трампнинг буйруқларига бўйсунмасликка чақиргани билан изоҳланди.
Давлат департаменти баёнотида Петро “зўравонликка даъват қилган, ўйламасдан ва масъулиятсиз ҳаракат қилган” деб баҳоланди. Президент Петро митинг давомида испан тилида сўзлаб, халқаро қўролли куч яратиш ва уни фаластинликларни озод қилишга йўналтиришга чақирди. Шунингдек, у АҚШ аскарларини “инсоният буйруғига қулоқ тутишга” ундади.
Хабарларга кўра, Давлат департаменти қарорни эълон қилар экан, Петро аллақачон Колумбия пойтахти Боготага қайтиб кетаётган бўлган. Аввалроқ у ижтимоий тармоқларда намойишда қилган чиқиши видеосини эълон қилиб, фаластинликларга нисбатан зўравонликларга қарши норозиликни давом эттиришга даъват этган эди.
