Forbes: Трамп оиласининг бойлиги 7,3 миллиард долларга етди

Forbes журнали маълумотларига кўра, АҚШ президенти Дональд Трамп ва унинг турмуш ўртоғи Мелания Трампнинг умумий бойлиги 2024 йил ноябридан буён 3 миллиард долларга ортиб, 7,3 миллиард долларга етган. Натижада, Дональд Трамп дунёнинг энг бой кишилари рейтингида 118 поғона юқорилаб, 201-ўринни эгаллади.

 

Нашр ҳисоб-китобларига кўра, бойликнинг асосий қисми — қарийб 2 миллиард доллар Трампнинг криптовалюта соҳасидаги инвестициялари билан боғлиқ. Шунингдек, Нью-Йорк апелляция суди томонидан фирибгарлик иши доирасида унга нисбатан белгиланган жариманинг бекор қилиниши давлат раҳбарига 500 миллион долларни тежаш имконини берган.

 

Forbes қайд этишича, Трамп ўз брендини пойабзал, соат ва атир каби маҳсулотларда лицензиялаш орқали қўшимча 400 миллион доллар даромад олган. Мелания Трамп эса китоблари, чиқишлари ва шахсий криптовалюта (memcoin) лойиҳаси орқали оилавий маблағни яна 200 миллион долларга оширган.

 

Шунингдек, Трамп оиласининг бошқа аъзолари ҳам сезиларли даромад ўсишига эришган. Дональд Жр. ва Эрик Трампнинг шахсий бойликлари кескин ошган бўлиб, улар American Bitcoin ва World Liberty Financial компанияларида улушларга эга. Иванка Трампнинг турмуш ўртоғи Жаред Кушнер эса Affinity Partners инвестиция компанияси орқали 4,6 миллиард доллардан ортиқ маблағ жалб қилиб, миллиардерлар қаторига қўшилган. У, шунингдек, Трампнинг кўчмас мулк бизнесида 560 миллион долларлик улушга эгалик қилади.