Венс: Россия Трамп иштирокидаги учрашувларни ҳам рад этди
АҚШ Россияни ўт очишни тўхтатиш бўйича музокаралардан бош тортишда айблади.
Вашингтон Россияни ўт очишни тўхтатиш бўйича музокаралардан қочишда айблади.
АҚШ вице-президенти Ж.Д. Венснинг Fox News телеканалига берган баёнотига кўра, Россия сўнгги ҳафталарда нафақат Украина вакиллари билан икки томонлама музокараларда, балки АҚШ президенти Доналд Трамп иштирокида ўтиши мумкин бўлган учрашувларда қатнашишдан ҳам бош тортган.
“Қўшма Штатлар ўт очишни тўхтатишга интилмоқда, бироқ бу жараён учун икки томоннинг ҳам тайёрлиги зарур. Россия эса музокаралардан қочиб келмоқда”, — деди Венс.
Унинг айтишича, Москва ҳатто президент ёки бошқа юқори мартабали расмийлар иштирокидаги уч томонлама мулоқотдан ҳам бош тортган.
Шунингдек, Венс АҚШ Украинага “Tomagawk” русумли қанотли ракеталарни етказиб бериш масаласи муҳокама қилаётганини тасдиқлади. Якуний қарор президент Трамп томонидан қабул қилинади.
The Wall Street Journal хабар беришича, Украина президенти Владимир Зеленский Нью-Йоркка ташрифи давомида Трампдан 2500 км масофагача учиш имкониятига эга бўлган “Tomagawk” ракеталарини сўраган.
Аввалроқ Axios манбалари Киевнинг бундай сўровларни бир неча бор билдиргани, бироқ рад жавоби олганини маълум қилган эди.
