OpenAI ChatGPT’да ота-она назорати функциясини ишга туширди
Янги тизим орқали ота-оналарни фарзандларининг стресс ҳолати ҳақида хабардор қилиш имконияти яратилади.
Bloomberg’нинг хабар беришича, OpenAI ChatGPT хизматида ота-она назорати имкониятларини жорий этди. Янги функциялар орқали ота-оналар фарзандлари учун айрим сервисларни чеклаши, шунингдек, уларнинг стресс ҳолатлари ҳақида хабардор бўлиши мумкин.
Мазкур тизим болага юборилган электрон таклиф орқали фаоллаштирилади. Ундан фойдаланиб, овозли режим, тасвир яратиш хизмати ёки олдинги суҳбатларга кириш имконияти чекланиши мумкин. Огоҳлантиришлар ота-онага SMS, электрон почта ёки махсус илова орқали юборилади. Шу билан бирга, фарзанднинг шахсий ёзишмалари уларга етказилмайди.
Қарор, шу йил баҳорида ўз жонига қасд қилган ўсмир оиласи томонидан OpenAI’га қарши киритилган суд даъвосидан кейин қабул қилинган. Даъводa компания ўсмирнинг ёзган хатларидан хавф белгилларини аниқламаганликда айбланганди.
Шунингдек, OpenAI фойдаланувчининг ёшини аниқлаш тизимини ҳам ишлаб чиқмоқда. Бу келгусида ота-она назорати функцияларини янада самарали қўллаш имконини беради.
