Покистонда теракт содир бўлди
Оқибатда камида 10 киши ҳалок бўлган.
Бугун, 30 сентябрь куни Покистоннинг Кветта шаҳридаги чегара қўшинлари бошқармаси олдида потрлаш юз бериб, камида ўн киши ҳалок бўлди, 32 киши турли даражада тан жароҳати олди.
Расмий маълумотларга кўра, портлашдан сўнг қуролланган гуруҳ қўшин постига ҳужум қилишга уринган, натижада хавфсизлик кучлари билан тўқнашув юз берган. Жанг пайтида бир неча ҳужумчи вафот этгани хабар қилинмоқда. Жабрланганлар орасида ҳам фуқаролар, ҳам ҳарбий хизматчилар бор.
Ҳозирча ҳужум учун масъулиятни ҳеч бир ташкилот ўз зиммасига олмаган. Шу билан бирга, Балужистон минтақасидаги ажралувчи гуруҳлар фаолияти туфайли ҳодисага кимлар алоқадор бўлиши мумкинлиги ҳақида турли тахминлар айтилмоқда.
Покистон президенти ва бош вазири воқеани кескин қоралаб, айбдорларга нисбатан қатъий чоралар кўрилишини билдирди. Ҳукумат қурбонлар оиласига таъзия йўллади, жабрланганлар эса шифохоналарга жойлаштирилди.
Маълумот учун, Балужистон стратегик аҳамиятга эга ҳудуд бўлиб, у ерда Хитой–Покистон иқтисодий йўлаги каби йирик лойиҳалар амалга оширилмоқда. Кветтадаги ушбу портлаш минтақанинг хавфсизлиги ва барқарорлигига жиддий таҳдид сифатида баҳоланмоқда.
