Афғонистонда интернет узилиши ортидан телеканаллар фаолияти тўхтади
Фақат RTA, Маариф ва RTA Sport каналлари онлайн эфирни давом эттирмоқда.
“Afghanistan International” нашрининг хабар беришича, Афғонистонда интернет ва телекомуникация хизматлари чеклангач, бир нечта йирик телеканаллар эфир узатишни тўхтатишга мажбур бўлди.
TOLO, Lemar, TOLOnews, Shamshad, Tamadon ва бошқа қатор телеканаллар илгари интернет орқали бериб келган дастурларини эфирдан олиб ташлаган. Ҳозирда фақат “Толибон” назоратидаги Radio Television Afghanistan (RTA), Маариф ва RTA Sport каналлари онлайн эфирни давом эттирмоқда.
Мамлакатда интернет тармоғи узилиши Moby Group’га қарашли TOLOnews, TOLO, Lemar, Arman ва Araziziya каби телеканаллар фаолиятига жиддий зарар етказган. Маълумотларга кўра, қарор “Толибон” бошқарувидаги Афғонистон телекомуникацияларини назорат қилиш агентлиги ҳамда Алоқа ва ахборот технологиялари вазирлиги томонидан қабул қилинган.
Roshan, Etisalat, Afghan Wireless ва Afghan Telecom каби йирик провайдерларга барча оптик толали тармоқларни ўчириш топшириғи берилган. Мутаҳассисларнинг таъкидлашича, оптик толали алоқанинг узилиши бутун мамлакат телекомуникация инфратузилмасини издан чиқарган ва Афғонистонни глобал тармоқдан узиб қўйган.
Манбаларга кўра, айрим хизматлар босқичма-босқич қайта тикланиши мумкин, бироқ юқори тезликдаги интернет ва оптик толали алоқа “Толибон” олий раҳбарининг буйруғи асосида тўлиқ тўхтатилган.
