Россияда 1500 киши депортация қилинмоқда
Қонунни бузган чет элликларнинг учдан бири аллақачон депортация қилинди.
Россия Ички ишлар вазирлигининг Москва шаҳар бўйича бош бошқармаси маълум қилишича, пойтахт ҳудудида миграция қонунчилигини бузган 1 500 дан ортиқ чет эл фуқаросига нисбатан депортация чоралари кўрилмоқда.
Вазирлик матбуот хизмати хабарига кўра, аниқланган хорижликларнинг учдан бир қисми allaqachon Россия Федерацияси ҳудудидан чиқариб юборилган. Қолган шахсларга нисбатан тегишли қарорлар кучга кирган.
“Бугунги кунга қадар 1 400 га яқин фуқарога депортация тўғрисида қарорлар қабул қилинган, 450 дан ортиқ шахс эса мамлакатдан чиқарилган”, — дейилади расмий баёнотда.
Маълумотларга кўра, жорий йил бошидан бери Москвада ҳуқуқни муҳофаза қилувчи органлар томонидан 240 дан ортиқ қидирувдаги шахс аниқланган. Шу билан бирга, 32 нафар шахсга нисбатан Россия фуқаролигини бекор қилиш бўйича қарорлар қабул қилинган.
Ички ишлар органлари йил бошидан бери миграция билан боғлиқ 58 мингдан ортиқ ҳуқуқбузарликларни қайд этган. Улардан 15 мингдан зиёди хорижий фуқаролар ёки фуқаролиги бўлмаган шахслар томонидан Россияда бўлиш қоидаларини бузиш билан боғлиқ.
Бундан ташқари, 3 700 та ҳолатда сохта ҳужжатлар орқали ноқонуний рўйхатдан ўтиш ҳаракатлари фош этилган.
