Францияда янги ҳукумат тузилди

Кеча, 5 октябрь куни Францияда узоқ давом этган сиёсий беқарорликдан сўнг янги ҳукумат шаклланди. Президент Эммануэл Макрон собиқ мудофаа вазири Себастиен Лесорнуъни бош вазир этиб тайинлади. Бу қарор мамлакат сиёсий ҳаётида муросага эришиш йўлидаги навбатдаги уриниш сифатида баҳоланмоқда.

 

Янги ҳукуматга ижтимоий масалалар, меҳнат бозорини тартибга солиш ва ташқи сиёсат йўналишлари бўйича тажрибали мутахассислар жалб этилган.

 

Франция парламентида ҳеч бир сиёсий куч кўпчилик овозга эга эмас. Бу эса ҳукуматнинг қарорлар қабул қилиш жараёнини мураккаблаштирмоқда. Лесорну махсус конституцион ваколатлардан фойдаланмаслик, балки сиёсий партиялар билан музокара ва муросага асосланган сиёсат олиб боришини билдирган.

 

Янги ҳукуматни бир қатор долзарб масалалар кутмоқда. Аввало, 2026 йил давлат бюджетини муҳокама қилиш ва қабул қилиш муҳим вазифалардан биридир. Шунингдек, ижтимоий ислоҳотлар, иммиграция масалалари, мудофаа харажатлари ва Европа Иттифоқидаги ҳамкорлик сиёсати ҳам ҳукумат кун тартибида турибди.

 

Францияда ҳукуматнинг барқарор ишлаши Европа Иттифоқи ҳамда халқаро ҳамжамият учун муҳим аҳамият касб этади. Чунки Франция нафақат Европа сиёсатида, балки глобал хавфсизлик масалаларида ҳам муҳим ўрин тутади. Шу боис Лесорну ҳукуматининг муваффақияти нафақат ички сиёсат, балки ташқи дипломатияда ҳам сезиларли таъсир кўрсатиши кутилмоқда.

 

Экспертлар фикрича, агар янги ҳукумат сиёсий муросаларни таъминлай олса, мамлакатдаги сиёсий инқироз юмшаши мумкин. Акс ҳолда, парламентдаги кучлар мувозанатсизлиги Францияни янги сайловлар сари етаклаши эҳтимолдан холи эмас.