“Tesla Optimus” роботи кунг-фу санъатини ўзлаштирмоқда
Робот сунъий интеллект асосида мустақил ҳаракат қилади.
Tesla компанияси асосчиси Илон Маск компаниянинг янги автоном роботи — Optimusнинг жанговор машғулотдаги видеotasвирини ижтимоий тармоқдаги X саҳифасида эълон қилди.
Видеода робот инсон билан кунг-фу машғулотида қатнашиб, ҳаракатларга синхрон тарзда жавоб қайтараётгани, зарба ва ҳимоя блокларини мувофиқлаштирилган, раққосликка ўхшаш услубда бажараётгани акс этган.
Маск робот ўз ичига ўрнатилган сунъий интеллект ёрдамида мустақил ишлаётганини ва инсон бошқарувисиз ҳаракат қилаётганини маълум қилди. У, шунингдек, роботнинг тезлиги ва силлиқлиги сезиларли даражада яхшиланганини таъкидлади.
Tesla компаниясининг сунъий интеллект бўйича вице-президенти Ашок Эллусвами компания Optimus роботлари ва автопилот тизимли электромобиллар учун ягона AI платформасини яратиш устида ишлаётганини билдирди.
Маълумот учун, Tesla Optimus илк бор 2021 йил 19 августда тақдим этилган бўлиб, 2022 йилда ишчи прототипи намойиш қилинган. Қурилмани 2026 йилда сотувга чиқариш режалаштирилган.
