Эрон президенти пойтахтни Теҳрондан жанубга кўчириш зарурлигини билдирди
Пойтахтни кўчириш таклифи Теҳрондаги сув танқислиги, чўкиш хавфи ва ҳаддан ташқари кенгайиш билан изоҳланди.
Эрон президенти Масуд Пезешкиан мамлакат пойтахтини Теҳрондан жанубий вилоятлардан бирига кўчириш зарурлигини маълум қилди. Президентнинг таъкидлашича, бу масала танлов эмас, балки Теҳрон шаҳрида ортиб бораётган экологик ва инфратузилмавий муаммолар сабаб мажбурий эҳтиёжга айланмоқда.
The Guardian нашрининг ёзишича, давлат раҳбари ушбу таклифни ўтган йили олий раҳнамо Оятуллоҳ Али Хоманаий билан муҳокама қилган. Президент сўзларига кўра, пойтахтнинг ҳозирги ҳолати — ҳаддан ташқари кенгайиш, сув танқислиги ва тупроқ чўкиш хавфи — мамлакат ресурсларига катта босим ўтказмоқда.
Масуд Пезешкиан бу фикрни Форс кўрфазидаги Ҳормозган вилоятига қилган ташрифи чоғ‘ида билдириб, жанубий минтақалар Эроннинг иқтисодий истиқболида муҳим ўрин тутишини қайд этди. У Ҳормозганнинг очиқ сув ҳавзаларига яқинлиги савдо, логистика ва саноат тармоқларини ривожлантириш учун кенг имкониятлар яратишини таъкидлади.
Давлат раҳбари шунингдек, Теҳрон, Караж ва Қазвин каби йирик шаҳарларда сув инқирози чуқурлашиб бораётганини қайд этди. Унинг маълумотларига кўра, 10 миллиондан ортиқ аҳолига эга Теҳрон мамлакат сув ресурсларининг қарийб 25 фоизини истеъмол қилади.
Президент ўтган йилдан бери кузатилаётган ёғингарчиликнинг кескин камайиши — 260 миллиметрдан 140 миллиметргача тушгани — сув танқислигини янада кучайтирганини таъкидлади. 2025 йилда ёғин миқдори 100 миллиметрдан пастга тушиши мумкинлиги ҳам прогноз қилинмоқда.
Масуд Пезешкиан назорациз урбанизация ва табиий ресурслардан ортиқча фойдаланиш Эрон учун экологик фалокат келтириб чиқариши мумкинлигини огоҳлантириб, “ўсиш ва ресурслар истеъмоли ўртасида мувозанат бўлмаса, ҳар қандай тараққиёт муваффақиятсизликка олиб келади”, — дея таъкидлади.
