Павел Дуров “эркин интернетни сақлаб қолишга” чақирди
У ўз туғилган кунида мурожаат билан чиқди.
Телеграм асосчиси Павел Дуров ўз туғилган кунида интернет эркинлигига бағишланган мурожаатини эълон қилди. Унга кўра, бир пайтлар ахборот алмашиш ва фикр билдириш эркинлиги тимсоли бўлган интернет бугун назорат ва цензуранинг асосий қуролига айланмоқда.
“Бизнинг авлодда оталаримиз яратган эркин интернетни сақлаб қолиш учун тобора камроқ вақт қолмоқда,” — деди Дуров ўз баёнотида.
Унинг сўзларига кўра, илгари эркинлик намунаси бўлган Германия, Буюк Британия ва Франция каби мамлакатлар бугун “антиутопик чоралар”ни жорий этмоқда. Шунга қарамай, Дуров Россия ҳақида ҳеч қандай изоҳ бермаган.
“Бизнинг авлод тарихда ўз эркинликларига эга бўлган, аммо уларни бой беришга йўл қўйган сўнгги авлод сифатида қолиш хавфи остида. Шу боис мен бугун байрам қилмайман. Менинг вақтим тугаяпти. Бизнинг вақтимиз тугаяпти,” — дея ёзди у.
Маълумот учун, Павел Дуров ҳозирда Францияда тергов остида. Ҳукумат уни расмий органлар сўровларига жавоб бермасликда ва хакерлик дастурлари тарқатилишига алоқадорликда айбламоқда.
