АҚШда портловчи моддалар ишлаб чиқариш заводида портлаш юз берди
Оқибатда ҳалок бўлганлар ва йўқолганлар бор.
АҚШнинг Теннесси штатида портловчи моддалар ишлаб чиқарувчи заводда кучли портлаш содир бўлди. Маҳаллий ҳокимият ва оммавий ахборот воситалари хабарига кўра, бир нечта инсон ҳалок бўлган, 20 нафарга яқин ходим йўқолган деб ҳисобланмоқда.
Ҳодиса маҳаллий вақт билан соат 07:45 атрофида Теннесси штатидаги Бакснорт шаҳарчаси яқинида юз берган. Кучли портлаш натижасида завод биноларидан бири бутунлай вайрон бўлган, атрофга чиқиндилар сочилиб, бир нечта ёнғин келиб чиққан.
Фавқулодда хизматлар дастлаб ёнғинлар ва иккинчи портлаш хавфи сабаб ҳудудга яқинлаша олмаган. Кейинчалик FBI ва ATF вакиллари воқеа жойига етиб келиб, сабабларни аниқлаш бўйича тергов ишларини бошлаган.
Компания маълумотига кўра, Accurate Energetic Systems ҳарбий, аэрокосмик ва саноат эҳтиёжлари учун турли хил портловчи моддалар ишлаб чиқаради. Ушбу завод АҚШ армияси ва денгиз флоти билан узоқ йиллик шартномаларга эга.
Портлаш пайтида атрофдаги уйлар ҳам силкингани маълум қилинди. Гувоҳлар портлаш тўлқинидан ойна ва эшиклар титраганини айтган. Маҳаллий ҳокимият органлари аҳолини тинчлантириш ва жабрланган оилаларга ёрдам кўрсатиш ишларини ташкил қилмоқда.
Собиқ ҳарбий ходимлар ва маҳаллий фуқароларнинг таъкидлашича, заводда аввал ҳам кичик миқёсдаги портлашлар содир бўлган, аммо бу галги ҳодиса кўлами бўйича сўнгги йиллардаги энг йириги ҳисобланади.
Дастлабки маълумотларга кўра, бу техник носозлик ёки хавфсизлик қоидаларининг бузилиши натижаси бўлиши мумкин.
