Башар ал-Асаднинг оиласи билан Россияда сиёсий бошпана топкани айтилмоқда
Россияда ҳозирда 1 200 дан ортиқ суриялик собиқ офицер ва амалдорлар яшаётганлиги билдирилди.
Германиянинг Die Zeit нашри Сурия собиқ президенти Башар Асад ва унинг оиласи ҳозирда Москва марказий қисми — “Москва-Сити” ҳудудидаги ҳашаматли осмонўпар бинолардан бирида яшаётганини маълум қилди. Нашрнинг Асадлар оиласига яқин манбаси хабар беришича, собиқ давлат раҳбари вақтини асосан онлайн видеоуйинларга сарфлайди ва баъзи ҳолларда яшаётган биноларининг биринчи қаватида жойлашган савдо марказида кўриниш беради.
Манбага кўра, Асадлар оиласи “Москва-Сити” ҳудудида 20 га яқин қимматбаҳо квартираларга эгалик қилади. Бироқ улар Россия ҳукумати томонидан белгиланган айрим шартлар доирасида яшайди. Хусусан, уларга сиёсий фаолият билан шуғулланиш ёки оммавий чиқишлар қилиш тақиқланган.
Die Zeit суҳбатдошининг сўзларига кўра: “Агар Асадлар оиласи бу талабларни бузмаса, улар Россияда хавфсизлик кафолатига эга бўлади ва уларнинг экстрадиция қилиниши масаласи кун тартибига қўйилмайди. Уларнинг шахсий хавфсизлиги махсус хусусий қўриқлаш хизматлари томонидан таъминланади.”
Шунингдек, нашр маълумотича, ҳозир Россияда 1 200 дан ортиқ суриялик собиқ офицер ва юқори лавозимли амалдорлар истиқомат қилмоқда. Уларнинг аксарияти Суриядаги фуқаролик уруши тугаганидан сўнг Россияга кўчиб ўтган.
Мазкур маълумот Россия томонидан расман тасдиқланмаган бўлса-да, Die Zeit хулосасига кўра, Москва Асад режими собиқ аъзоларига сиёсий бошпана ва ҳимоя тақдим этаётган бўлиши мумкин.
