Финляндияда бразилиялик футболчи ўйиндан сўнг ҳибсга олинди
“Финнкурд” футболчиси Жонатан Геррейро келишилган ўйинда гумонланиб ҳибсга олинган.
Финляндияда ўтказилган бешинчи дивизион баҳсида “Финнкурд” жамоасининг бразилиялик футболчиси Жонатан Геррейро ўйиндан сўнг полиция томонидан қўлга олинди. У келишилган ўйинда иштирок этганлик ва уни ташкил этганликда гумонланмоқда, деб хабар берди “Globo” нашри.
Воқеа 5 октябрь куни “Финнкурд” ва “Эспа/Ренат” жамоалари ўртасидаги учрашувдан кейин содир бўлган. Якуний ҳуштак чалинганидан сўнг майдондан чиқиш йўллари тўсилиб, фуқаролик кийимида бўлган 20 га яқин полиция ходими майдонга кирган. “Финнкурд” футболчилари захира ўриндиғига ўтқазилиб, ҳужжатлари текширувдан ўтказилган.
Натижада Жонатан Геррейро билан бирга яна икки бразилиялик футболчи ҳам ҳибсга олинган. Бироқ уларнинг телефонлари ўрганилгандан сўнг, сўнгги икки футболчи озод этилган.
Геррейро “Финнкурд” жамоасида 2024 йил май ойидан бери тўп суради. Бунгача у 2022–2023 йилларда Финляндиянинг “Пеймари Юнайтед” клуби сафида ўйнаган.
Ҳозирда тергов органлари томонидан футболчининг ўйинда ноқонуний битимда иштирок этгани ёки ташкилотчилик қилгани юзасидан суриштирув ишлари олиб борилмоқда.
