Эрдоған: Ғазода болалар яна табассум қилмоқда, ёрдам юк машиналаримиз манзилга етмоқда
Туркия раҳбари Ғазо аҳолисига ёрдам етказилаётганини ва минтақада тинчлик ўрнатиш йўлида саъй-ҳаракатлар кучайтирилаётганини маълум қилди.
Туркия президенти Ражаб Тоййиб Эрдоған минтақада содир бўлаётган геосиёсий жараёнлар ҳақида сўз юритар экан, дунё ўзгаришлар даврига кирганини ва Туркия чегаралари атрофида янги дунё тартиби шаклланаётганини таъкидлади. Бу ҳақда у Трабзонда қуриб битказилган бир қатор лойиҳаларнинг очилиш маросимида маълум қилди.
“Бизнинг яқин атрофимиз тарихий бурилишларни бошдан кечирмоқда. Минтақамизда содир бўлаётган воқеалар туфайли янги дунё тартиби шаклланмоқда”, — деди Эрдоған.
Давлат раҳбари Россия ва Украина ўртасидаги уруш тўрт йилдан бери давом этаётганини эслаб, бу можаро наfaқат минтақада, балки бутун дунёда хавотир ва беқарорликни кучайтираётганини қайд этди.
“Мувозанат ва адолат сиёсати юритамиз. Ҳар икки давлат билан мулоқотни давом эттиряпмиз. Бу урушда фақат қон савдогарлари ютмоқда, халқ эса ютқазмоқда. Туркия тўқнашувни тўхтатиш учун қўлидан келганини қилишга тайёр”, — деди Туркия президенти.
Эрдоған, шунингдек, Ғазодаги вазиятга ҳам алоҳида тўхталиб ўтди. Унинг сўзларига кўра, икки йиллик фожиалардан сўнг барқарор тинчлик сари биринчи амалий қадам ташланди.
“Ғазодаги биродарларимиз узоқ йиллар ичида илк бор енгил нафас олишди. Болалар яна табассум қилмоқда, гуманитар ёрдам оқими ортди. Овқат ва дори-дармон ортилган юк машиналаримиз allaqachon Ғазога етиб борди”, — деди у.
Президентнинг сўзларига кўра, ўт очишни тўхтатиш — жараённинг охири эмас, балки барқарор тинчликка томон йўлнинг бошланиши.
“Исроил имзолаган мажбуриятларини бажариши зарур. Ғазо тезда тикланиши керак. Совуқ тушмасидан олдин биродарларимиз чодирларда қолиб кетмаслиги лозим”, — дея якунлади Эрдоған.
