Голливуд юлдузи Даян Китон 79 ёшида вафот этди
Актриса “Чўқинтирган ота” ва “Энни Холл” фильмлари орқали дунёга танилган.
Голливуднинг афсонавий актрисаси, “Чўқинтирган ота” ва “Энни Холл” фильмлари билан миллионлаб томошабинлар қалбидан жой олган Даян Китон 79 ёшида оламдан ўтди. Бу ҳақда унинг вакили People нашрига маълум қилган.
Вакилнинг сўзларига кўра, актрисанинг ўлим сабаблари ҳозирча ошкор этилмаган. “Оиласи ушбу оғир дамларда шахсий ҳаёт дахлсизлиги ҳурмат қилинишини сўрайди”, — дейилади баёнотда.
Даян Китон Фрэнсис Форд Копполанинг “Чўқинтирган ота” трилогиясидаги Кей Адамс-Корлеоне роли орқали дунёга танилган. 1977 йилда у “Энни Холл” фильмидаги ижроси учун “Оскар” мукофотига сазовор бўлган. Шунингдек, “Қизиллар”, “Марвин хонаси” ва “Куперларни севиш” фильмлари орқали яна бир неча бор “Оскар”га номзод бўлган. Сўнгги фильми учун у “Олтин глобус” мукофотини ҳам қўлга киритган.
Ижод давомида Китон машҳур режиссёр Вуди Аллен билан бир нечта фильмда ҳамкорлик қилган. Унинг энг машҳур асарлари орасида “Биринчи хотинлар клуби”, “Бир нарса бериш керак” ва “Китоб клуби” фильмлари бор.
Ижоддан ташқари, у режиссёрлик, продюсерлик ва ёзувчилик билан ҳам шуғулланган, шунингдек, Альтсгеймер касаллигидан азият чеккан одамларга ёрдам берувчи хайрия фаолияти билан ҳам танилган.
