Россияда 770 минг муҳожир депортация қилиниши мумкин
Давлат думаси маълумотларига кўра, йил бошидан бери 35 мингдан ортиқ муҳожир Россиядан чиқариб юборилган.
Россияда иммиграция тартиб-қоидаларини бузган хорижий фуқароларга нисбатан кенг кўламли чоралар кўрилмоқда. Давлат думаси спикери Вячеслав Володин маълум қилишича, мамлакатда яшаш асосларини қонунийлаштирмаган 770 мингдан ортиқ муҳожир депортация рўйхатида қолмоқда.
Расмий маълумотларга кўра, 2025 йилнинг январ–август ойларида Россиядан 35 мингга яқин чет эллик шахс депортация қилинган. Шу билан бирга, қонуний бўлмаган муҳожирларнинг рўйхати Ички ишлар вазирлиги томонидан шакллантирилган ва уларнинг ҳаракатлари қатъий назорат остига олинган.
Янги миграция тартибига мувофиқ, рўйхатдаги шахслар орасида тиббий кўрикдан ўтмаганлар, бармоқ изи топширмаганлар, рухсатнома ёки яшаш ҳужжатини янгиламаганлар ҳам бор. 10 сентябрда уларнинг қонуний мақомини тиклаш муддати якунланган.
Володиннинг сўзларига кўра, ушбу шахслар Россияни ихтиёрий тарк этишлари, жўнаб кетиш санаси ва йўналиши ҳақида тегишли идораларга хабар беришлари лозим. Акс ҳолда, улар мажбурий депортация қилинади, жарима белгиланади ва беш йил муддатга кириш таъқиқи қўйилади.
