Россияда рейд давомида ўзбекистонлик фуқаро ҳибсга олинди
Ўзбекистон Бош консуллиги Россия ҳуқуқ-тартибот органларидан воқеа тафсилотларини сўраб расмий сўров юборди.
Россиянинг Красноярск ўлкасида ўзбекистонлик фуқаро ҳуқуқ-тартибот органлари томонидан олиб борилган рейд чоғида ушланган. Маълум қилинишича, рейд Миндерла қишлоғидаги паррандачилик хўжалигида ўтказилган бўлиб, у ерда меҳнат муҳожирлари истиқомат қилган.
Ўзбекистон Республикасининг Новосибирск шаҳридаги Бош консуллиги маълумотига кўра, Россия ички ишлар идоралари мазкур ҳудудда иммиграция қоидаларига риоя этилиши ҳамда гиёҳванд моддалар ноқонуний муомаласи билан боғлиқ ҳолатларни аниқлаш мақсадида текширув ўтказган.
Рейд вақтида аниқланган 20 нафар ўзбекистонлик фуқаролардан фақат биттаси қўлга олинган. Унинг шахси аниқланган, бироқ ҳибсга олиш сабаблари ҳозирча расман маълум қилинмаган.
Ўзбекистон Бош консуллиги Россия томони билан дипломатик каналлар орқали расмий ахборот алмашинувини йўлга қўйганини ва мазкур ҳолат юзасидан батафсил маълумот сўраб сўров юборганини билдирди.
Консуллик вакиллари вазиятни назорат остида ушлаб турибди ҳамда ОАВдан фақат расмий манбаларга таянишларини сўрамоқда.
