Тожикистонда биринчи метро қурилиши 2028 йилда бошланади
Метро қурилиши якунлангач, Тожикистон Марказий Осиёда Ўзбекистон ва Қозоғистондан кейин метро тизимига эга бўлган учинчи мамлакатга айланади.
Тожикистон пойтахти Душанбе шаҳрида биринчи метро линияси қурилиши 2028 йилда бошланиши режалаштирилмоқда. Мазкур йўналиш шаҳарнинг жанубий қисмидан марказгача чўзилиб, умумий узунлиги 10,5 километрни ташкил этади.
Бу ҳақда Душанбе шаҳар ҳокимининг ўринбосари Раҳмиддин Саломзода маълум қилди.
2022 йил март ойида Тожикистон Транспорт вазирлиги ҳамда Корея Миллий темир йўл компанияси ўртасида метро тизимини лойиҳалаш бўйича ўзаро англашув меморандуми имзоланган эди.
Лойиҳа доирасида Транспорт вазирлиги, Душанбе шаҳар ҳокимлиги ва Жанубий Кореянинг бир қатор компаниялари мутахассислари ҳамкорликда иш олиб бормоқда.
Метронинг ишга туширилиши якунлангач, Тожикистон Марказий Осиёда Ўзбекистон ва Қозоғистондан кейин метро тизимига эга бўлган учинчи мамлакатга айланади.
