Япония тарихида илк бор аёл киши бош вазир бўлди
Бу мамлакат сиёсий ҳаётида янги саҳифа очган воқеа сифатида баҳоланмоқда.
Япония парламенти тарихий қарор қабул қилиб, 64 ёшли сиёсатчи Санаэ Такаичини мамлакат бош вазири этиб тайинлади. Шу тариқа у Япония тарихида бу лавозимни эгаллаган биринчи аёл бўлди.
Такаичи Либерал Демократик партия (LDP) етакчиси сифатида парламентнинг қуйи палатасида зарур овозларни тўплаб, расмий равишда ҳукумат бошлиғи лавозимини эгаллади. Унинг партияси “Japan Innovation Party” билан тузган коалиция ёрдамида ҳукуматни шакллантирди.
Янги бош вазир мамлакат иқтисодиётини барқарорлаштириш, яшаш харажатларини камайтириш, миллий хавфсизликни мустаҳкамлаш ва Япония конституциясини замон талаблари асосида ислоҳ қилишни ўз олдига мақсад қилиб қўйган. Такаичи, собиқ бош вазир Синдзо Абэнинг яқин сафдоши бўлиб, у билан бир қаторда консерватив қарашлари ва миллий қадриятларга содиқлиги билан танилган.
Такаичининг асосий вазифалари қаторида инфляцияни жиловлаш, аҳоли турмуш даражасини яхшилаш, минтақавий хавфсизликни таъминлаш ва халқаро иттифоқчилар — хусусан, АҚШ билан ҳамкорликни мустаҳкамлаш бор.
Японияда илк маротаба аёл бош вазирнинг ҳокимият тепасига келиши мамлакат сиёсий ҳаётида янги саҳифа очган воқеа сифатида баҳоланмоқда.
