Брижит Макрон Франция солиқ порталида “эркак” сифатида рўйхатга олинган

Франция Президенти Эммануэль Макроннинг рафиқаси, мамлакатнинг биринчи хоними Брижит Макрон расмий солиқ порталида “Жан-Мишел” исми билан рўйхатдан ўтгани аниқлангани ҳақида BFMTV телеканали ҳужжатли фильмида маълум қилинди.

 

Телеканал эълон қилган лавҳага кўра, Брижит Макрон маъмурияти раҳбари Тристан Боман ушбу ҳолат 2023 йил сентябрь ойида солиқ декларацияси текшируви пайтида аниқланганини маълум қилган. Унинг сўзларига кўра, тизимда Брижит Макроннинг исми ўрнига “Жан-Мишел” деб ёзилган бўлган.

 

Боман таъкидлашича, бу оддий техник хато эмас, балки “ташқи аралашув натижасида юзага келган ҳолат” бўлган. Елисей саройи бу воқеани жиддий қабул қилган ва Брижит Макрон расмий шикоят билан чиқиш қилган.

 

Текширув натижасида икки нафар шахс маълумотларни ноқонуний равишда ўзгартирганликда гумонланиб, терговга жалб этилган.

 

Маълумот учун, 2022 йилда Брижит Макрон “эркак сифатида туғилган” деган даъволар ижтимоий тармоқларда тарқалган эди. Шу сабабли 2021 йилда у Амандин Руа ва журналист Наташа Рейга қарши туҳмат иши бўйича судга мурожаат қилган.

 

2024 йил март ойида Президент Макрон бу миш-мишларни “мутлақ ёлғон” деб атаган ва бундай иддаоларни қатъиян рад этган.

 

2024 йил июнь ойида Парижда мазкур масала бўйича суд жараёни бошланган ва ўша йил сентябрида суд айбланувчиларни 13 500 евро миқдорида жаримага тортган.