Эрдўғон: “Биз урушни тугатишга ҳисса қўшишга тайёрмиз”
Туркия президенти Эрдўғон АҚШ ва Россия саммитини Истанбулда ўтказишни таклиф қилди.
Туркия Президенти Ражаб Тоййиб Эрдўғон мамлакатининг АҚШ ва Россия ўртасида ўтказилиши режалаштирилаётган саммитга мезбонлик қилишга тайёрлигини билдирди.
Бу ҳақда Туркия оммавий ахборот воситалари хабар берди. Давлат раҳбарининг таъкидлашича, Туркия, хусусан, Истанбул тинчлик музокаралари учун қулай майдон бўла олади.
“Туркия ва Истанбулнинг Украинадаги можарога тинч йўл билан ечим топишдаги роли яна бир бор ўз исботини топди. Биз исталган вақтда Украина бўйича музокараларни ташкил этишга тайёрмиз. Венгрияда режалаштирилган учрашув амалга ошмагани ачинарли, аммо ҳар қандай мулоқот урушни тугатишга хизмат қилади”, — деди Эрдўғон Форс кўрфази мамлакатларига қилган сафаридан сўнг.
Туркия етакчиси, шунингдек, Анқара ҳам АҚШ, ҳам Россия билан ишончли ва барқарор дипломатик муносабатларга эга эканини таъкидлади. Унга кўра, бу омил Туркияни тинчлик музокаралари учун ишончли платформага айлантиради.
