Жанубий Кореяда ноқонуний муҳожирларга қарши кенг кўламли рейдлар бошланди

Жанубий Корея ҳукумати мамлакат ҳудудида ноқонуний яшаб келаётган хорижий фуқароларни аниқлаш ва иммиграция тартибларини мустаҳкамлаш мақсадида йирик кўламли рейдларни бошлади.

 

Адлия вазирлиги, Миллий полиция, Денгиз полицияси ҳамда Меҳнат ва транспорт вазирликлари ҳамкорлигида ўтказилаётган текширувлар 12 декабргача давом этади. Тадбирлар ноқонуний меҳнат фаолияти билан шуғулланаётган чет элликлар, воситачилар ҳамда мамлакатда рухсатсиз истиқомат қилаётган шахсларни аниқлашга қаратилган.

 

Айниқса, 2025 йилда бўлиб ўтадиган APEC Корея саммити арафасида хавфсизлик чораларининг кучайтирилиши муносабати билан Кёнжу шаҳри ва унга туташ ҳудудларда назорат кучайтирилди.

 

Жанубий Корея қонунчилигига кўра, иммиграция қоидаларини бузган шахсларга нисбатан жарима, депортация ва мамлакатга киришни чеклаш чораси қўлланади. Шу билан бирга, Адлия вазирлиги рейдлар жараёнида хорижликларнинг инсон ҳуқуқлари тўлиқ таъминланишига алоҳида эътибор қаратилишини маълум қилди.

 

Шунингдек, муҳожирларга ўз ихтиёри билан мамлакатни тарк этиш ёки ҳуқуқий мақомини қонунийлаштириш тавсия этилди. Расмийлар бу усул келгусида оғирроқ ҳуқуқий оқибатларнинг олдини олишга хизмат қилишини таъкидламоқда.

 

Ўзбекистон Ташқи меҳнат миграцияси агентлиги маълумотларига кўра, йил бошидан буён 26 нафар ўзбекистонлик фуқарога Е-9 визаси шартларини бузганлик учун жарима қўлланилган. Уч томонлама келишувга мувофиқ, ҳар бир ноқонуний ўтган ой учун 2000 АҚШ доллари миқдорида жарима белгиланган.