Москвада таёқ ва белкурак билан қуролланган муҳожирлар ўртасида оммавий муштлашув содир бўлди
Муштлашув оқибатида бир неча киши тан жароҳати олган, 40 га яқин иштирокчи эса ҳибсга олинган.
Москвада “Прокшино” турар-жой мажмуасида муҳожирлар иштирокида оммавий муштлашув содир бўлди. Ижтимоий тармоқларда тарқалган видеоларда бир неча ўнлаб шахсларнинг таёқ, белкурак ва йўл белгиларидан қурол сифатида фойдаланиб, бир-бирига ҳужум қилгани акс этган.
Россия Ички ишлар вазирлиги хабарига кўра, ҳодиса юзасидан тезкор тергов ҳаракатлари олиб борилмоқда. Ҳозирча можаронинг сабаблари ва иштирокчиларнинг миллати ҳақида расмий маълумот берилмаган.
Воқеа жойига тезкорлик билан етиб келган полиция тартибни тиклаган, 40 га яқин киши эса бўлимга олиб кетилган. Дастлабки маълумотларга кўра, тўрт киши турли даражадаги тан жароҳатлари олган, бир нечта транспорт воситаларига зарар етган.
Россия Жиноят кодексининг 213-моддаси (“Безорилик”) бўйича жиноий иш қўзғатилди. Ички ишлар вазирлиги матбуот котиби Ирина Волкнинг маълум қилишича, қўлга олинган хорижликлар бўйича қаттиқ чоралар кўрилади.
Унинг сўзларига кўра, жиноий жавобгарликка тортиламаган фуқаролар мамлакатдан маъмурий тартибда чиқарилади: “Муштлашувда қатнашган хорижликларга нисбатан депортация чоралари қўлланади. Уларнинг Россияга қайта киришига 5 йил муддатга таъқиқ қўйилади, қайта ҳуқуқбузарлик содир этганлар учун эса бу муддат 10 йилгача узайтиради,” — деди Ирина Волк.
Ҳозирда тергов давом этмоқда. Ҳуқуқни муҳофаза қилувчи органлар барча иштирокчиларни аниқлаб, уларни қонун олдида жавобгарликка тортишни мақсад қилган.
