Камала Харрис: “Оқ уйни бошқарадиган биринчи аёл бўлишим эҳтимолдан холи эмас”

АҚШ собиқ вице-президенти Камала Харрис келгусида президентликка номзодини қайта илгари суриш эҳтимолини рад этмади. BBC нашрига берган интервьюсида у сиёсатдан бутунлай четланиш ниятида эмаслигини, жамоат хизматини ўз ҳаётининг ажралмас қисми деб билишини таъкидлади.

 

“Мен бутун фаолиятимни одамларга хизмат қилишга бағишлаганман. Бу менинг табиатимда бор ва бундан воз кеча олмайман”, — деди у.

 

Харрисдан “Оқ уйни бошқарадиган биринчи аёл бўлишингиз мумкинми?” деб сўралганида, сиёсатчи “Эҳтимол, ҳа”, дея жавоб қайтарди. Шу билан бирга, у ҳозирча президентлик сайловида иштирок этиш бўйича якуний қарор қабул қилмаганини билдирди.

 

АҚШда навбатдаги президентлик сайлови 2028 йилда ўтказилади. Харрис ўзининг кейинги сиёсий қадамлари ҳақида ҳали якуний фикрга келмаганини, бироқ мамлакат равнақи йўлида фаол бўлиш ниятида эканини қайд этди.

 

Шунингдек, у Демократик партияда ўз номзоди “кучсиз” деб баҳоланиши ҳақидаги фикрларга жавобан, “Мен сўров натижасига эмас, ишонч ва ҳаракатга таянганман”, дея билдирди.

 

Интервью давомида Камала Харрис амалдаги президент Дональд Трамп фаолиятини ҳам танқид қилиб, уни давлат институтларидан шахсий манфаатлар йўлида фойдаланаётганликда айблади.

 

Сўнгги сайловда Харрис 48,43 фоиз овоз тўплаган, бироқ Трамп устунликни қўлга киритганди. Сиёсий таҳлилчиларга кўра, Харриснинг сўнгги баёноти унинг 2028 йилги сайловларга тайёргарлик жараёнини бошлаб юборганидан дарак беради.