Покистон–Афғонистон чегарасида қуролли тўқнашув: 30 дан ортиқ киши ҳалок бўлди

Покистон армияси маълум қилишича, 24–25 октябрь кунлари Афғонистон билан чегарадош Куррам ва Шимолий Вазиристон ҳудудларида юз берган қуролли тўқнашувлар оқибатида беш нафар покистонлик ҳарбий ва 25 нафар жангари ҳалок бўлган. Бу ҳақда “Al Jazeera” нашри Покистон Қуролли кучлари матбуот хизматига таяниб хабар берди.

 

Расмий маълумотларга кўра, жангари гуруҳлар Афғонистон ҳудудидан Покистон томон ўтишга уринган. Исломобод “Толибон” ҳукуматини ўз ҳудудида фаолият юритаётган қуролли гуруҳлар фаолиятига қарши етарли чора кўрмаётганликда айблади.

 

Кобул эса бундай даъволарни қатъиян рад этиб, Покистон томонидан амалга оширилаётган ҳарбий амалиётлар Афғонистон суверенитетини бузишига ишора қилди.

 

Жорий ой бошида Истанбулда икки томон вакиллари ўртасида музокаралар ўтказилиб, чегара ҳудудида такрорий тўқнашувларнинг олдини олиш масаласи муҳокама қилинган эди. Бироқ сўнгги ҳодиса 2021 йилда “Толибон” ҳокимият тепасига келганидан бери энг кескин ҳарбий тўқнашувлардан бири сифатида баҳоланмоқда.

 

Покистон мудофаа вазири Хаважа Муҳаммад Асифнинг таъкидлашича, агар дипломатик мулоқот натижа бермаса, мамлакат очиқ ҳарбий жавоб чораларини кўришга тайёр.

 

Покистон ҳарбийлари сўнгги тўқнашувларда иштирок этганларни “Фитна ал-Хавориж” деб атади — бу атама хорижий ғоялар таъсиридаги қуролли гуруҳларга нисбатан ишлатилади.