Янги Зеландияда бола ичагидан 100 та магнит олиб ташланди
Магнитлар 13 ёшли боланинг ичак деворларини кесиб, тўқималарнинг нобуд бўлишига сабаб бўлган.
Янги Зеландияда 13 ёшли бола неодим магнитларни ютиб юборгани оқибатида оғир жарроҳлик амалиёти ўтказди. Тиббий текширувлар давомида боланинг ичагидан қарийб 100 та магнит чиқариб олинди.
Маълум қилинишича, ўсмир ушбу магнитларни интернет орқали сотиб олган. Тиббий кўрикда магнитларнинг ичак деворини кесиб ўтганлиги, айрим қисмларда тўқималар нобуд бўлганлиги аниқланган. Шифокорлар беш соатдан ортиқ давом этган мураккаб жарроҳлик амалиёти орқали боланинг ҳаётини сақлаб қолишга муваффақ бўлишган.
Расмий маълумотларга кўра, бундай магнитлар Янги Зеландияда 2013-йилдан бери савдога чиқарилиши тақиқланган. Шунингдек, ўсмир уларни онлайн платформа орқали сотиб олгани аниқланган. Савдо компанияси мазкур ҳолат юзасидан ички текширув бошлаганини билдирди.
