Европа Иттифоқи Қозоғистон, Қирғизистон ва Тожикистон банкларига чекловлар жорий этди
Чекловлар Россия билан молиявий ҳамкорлик қилган банкларга нисбатан жорий этилди.
Европа Иттифоқи Россияга қарши санкцияларнинг 19-босқичи доирасида Қозоғистон, Қирғизистон ва Тожикистондaги айрим молия институтларига нисбатан чеклов чораларини эълон қилди. Бу ҳақда Еврокомиссия расмий баёнотида маълум қилинди.
Қайд этилишича, Россия банки ВТБнинг Қозоғистондаги филиали, Қирғизистоннинг Толубай ва Евроосиё жамғармa банклари, шунингдек, Тожикистоннинг Dushanbe City Bank, Spitamen Bank ва Commerzbank молия муассасалари санкциялар рўйхатига киритилган.
Шунингдек, Беларусда фаолият юритаётган ВТБ, Сбербанк, Альфа-Банк, БелВЭБ ва Белгазпромбанк филиаллари ҳам чекловларга дуч келди. ЕИ санкциялари Payeer тўлов тизимини ҳам қамраб олади.
Мазкур чора-тадбирлар 2025 йил ноябр–декабр ойларида кучга киради.
Янги санкция пакети, шунингдек, 2027 йилгача Россиядан суюлтирилган газ импортни босқичма-босқич тақиқлаш, Россиянинг “соя флоти” деб аталувчи 117 та танкерини қора рўйхатга киритиш ва “Роснефть” ҳамда “Газпром нефть” билан операцияларни тўлиқ тўхтатишни ўз ичига олади.
Бундан ташқари, Брюссель Россияга санкциялардан қочишда ёрдам бераётган деб топилган 45 та компанияга нисбатан ҳам чеклов киритган — улар орасида Хитой ва Гонконгда рўйхатдан ўтган 12 та ташкилот мавжуд.
