Исроилда икки йилда илк марта фавқулодда ҳолат бекор қилинди
Исроил ҳукумати 2023 йил 7 октабрда ҲАМАС ҳужуми ортидан фавқулодда ҳолат эълон қилган эди.
Исроил мудофаа вазири Исраэл Кац мамлакат жанубида икки йил давом этган фавқулодда ҳолат бекор қилинганини маълум қилди.
Бу ҳақда The Times of Israel нашрига таяниб, халқаро ОАВлар хабар берди.
Вазирнинг таъкидлашича, ушбу қарор Исроил жанубидаги “янги хавфсизлик воқелиги”ни акс эттиради. Унга кўра, бу ҳолат Исроил мудофаа кучларининг сўнгги икки йил давомида ҲАМАС террорчилик ташкилотига қарши олиб борган қатъий ва тизимли ҳаракатлари натижасида юзага келган.
“Биз Исроил мудофаа кучларининг тавсияларига амал қилдик ва 2023 йил 7 октабрдан буён илк марта фронт ортидаги махсус огоҳлантириш ҳолатини пасайтирдик”, — деди Исраэл Кац.
Маълум қилинишича, Исроил ҳукумати 2023 йил 7 октабр куни ҲАМАСнинг ҳужуми ортидан фавқулодда ҳолат эълон қилган эди. Кейинчалик у фақат мамлакат жанубий ҳудудлари билан чегараланган ҳолда давом эттирилган.
Исроил томони бу қарорни мамлакатдаги хавфсизлик барқарорлашганининг муҳим белгиси сифатида баҳоламоқда.
